#_جينډر_ډسکرمينېشن

تاسو به وايئ چې د پښتو پۀ ليک کښې د انګرېزۍ عنوان ولې ؟ سوال پۀ خپل ځائے سهي دے – خو کۀ زۀ ” جنسي استحصال” وليکم نو ستاسو مازغۀ “جېنډر ” طرف ته ځي ؟ بالکل به نۀ ځي – ځکه چې زمونږ سره د جېنډر له پاره د جنس نه علاوه بل هېڅ کتابي ټکے نشته – پۀ دې قابض الرجال ټولنه کښې د زنانه د استحصال دا اولنۍ پوړۍ زمونږ د استحصالي سوچ عکاسي کوي –
مخکښې ځو – خبره دلته هم پاتې نۀ ده – بيا د جينۍ پۀ پېدائش ښځې له پېغورونه ورکوو – حالانکه د هغې پۀ دې کښې هېڅ قصور نۀ وي – کۀ خاوند ئې لوفر ، لفنګ وي او د کار روزګار نۀ وي نو د دې ذمه واره هم ښځه ګڼو – ځکه چې زمونږ پۀ مزغو کښې دا دروغ فټ کړے شوي دي – چې رزق د ښځې پۀ نصیب وی – چې د دغې زياتي د لاسه ئې پۀ نفسياتي توګه بيماره کړو – نو وايو پۀ دې پېريان دي – او بيا پرې د باباګانو ، پيرانو ، عاملانو پۀ نامه بله استحصالي لړۍ پېل کړو –
مخکښې ځو – چې د مجاهد ملت له پاره پۀ ممبر دعا کيږي – نو وايي خدايه پاکه پلاني نېک صالحه نارينه اولاد ورکړې – نو ايا جينۍ د پېدائش پۀ دې دعا کښې هېڅ حق نۀ لري – بیا د سکول نه محرومي او د پلار د جائداد نه محرومه کول خو د مجاهد ملت يوه بله کارنامه ده –
مخکښې ځو – زمونږ خلک چې جينۍ له شاباسے هم ورکوي يا د فخر پۀ توګه ئې رابلي – نو وائي دا زما لور نۀ ده – دا زما ځوئے دے – نو ايا دا د هغې د جېنډر توهين نۀ کيږي – ولې د هغې د پښو نه مونږ د هغې خپل شناخت شوکوو – او د پردي جېنډر پۀ بېساکو ئې ودروو ؟
مخکښې ځو – ښځه او سړے ، زنانه او نارينه ، نر او ماده متضاد ټکي دي – خو نر مونږ همېشه د بهادر او تکړه پۀ معنو کښې اخلو – د دې مطلب دا دے چې بهادر به صرف سړے وي – دا د جېتډر د نا وئيلي استحصال يو بل اړخ دے –
مخکښې ځو – زمونږ پۀ ژبه کښې د متلونو يوه لويه ذخيره صرف د زنانوۀ د توهين سبب ګرڅي – لکه
کۀ د ښځې پوزه نۀ وے نو غ_ل به ئې خوراک وو
ښځه يا د کور ده يا د ګور ده
ښځه د پښو پېزار دے
ښځه کږه پښتۍ ده ماته به شي خو سمه به نشي
ښځې ته ګوره او پړي غړلو ته ګوره
د ژوندۍ لور نه مړ ځوے ښۀ دے
او دغسې نورې بلها متلې دي – ايا مونږ نارينه ټولنه به د يو ژوندي قام پۀ حيث پۀ دې د زنانوۀ نه معافي اوغواړي – او دا متلې به د خپل تاريخي پنګې نه حذف کړي ؟
مخکښې ځو – ژوندي قامونه چې مخ پۀ وړاندې ځي نو هغه د وخت سره سره خپلې غلطۍ ټيک کوي – انګرېزانو د جېنډر استحصال ختمولو پۀ سبب داسې بلها ټکي بدل کړي دي – لکه
Manpower – Work Force
Sex – Gender
Mankind – Huminity
Fireman – Firefighter
Policeman – Police Officer
Chairman – Chair
Batsman – Bater
کنېډا خو پۀ خپله قامي ترانه کښې هم پۀ دې حواله بدلون کړے دے – ايا مونږ دومره حوصله لرو – او د خپلې ژبې سره سره خپلې روئې بدلولے شو – چې د دې استحصال خاتمه اوشي ؟
#ډاکټرديداريوسفزے