د کال ۱۹۸۱ نننۍ ورځ وه چې دغه ستر انسان له مونږ جدا شو خو مونږ ته يې د خپل فکر او علم دومره څه پريښول چې په ويښ ژوندي او باضميره اولس کښې به تر ابده ژوندی وي—البته زمونږ يو غفلت بيا هم شته چې مونږ د هغه فکر او علم نه هغسې ګټه هم وانه خستی شوه او هغسې درناوی مو هم ور نه کړی شو څنګه يې چې حق وو— تر دې چې نوی نسل د هغه د شخصيب او کارنامو د اهميت نه سم خبر هم نه دی-ارواښاد دوست محمد خان کامل هغه انسان دی چې په کال ۱۹۳۸ کښې چا لسم هم نه شو پاس کولی نو کامل پکښې د علي ګړ پوهنتون نه قانون او فلسفه کښې د ماسټر سندونه راول-
کامل هغه محقق او عالم دی چې په خوشحال بابا او رحمان بابا يې مونږ ته د کره څيړنې لارې خلاصې کړې —کامل مرحوم په تاريخ مرصع د شپږ نيم سوه صفحو مقدمه او د تاريخ مرصع د متن نه زيات تشريحات وليکل چې دغه کار شايد د کامل صيب نه علاوه بل يو پښتون هم نه وی کړی-
کامل هغه محقق دی حې په خوشحال بابا د مستشرقينو د اعتراضاتو غاښ ماتوونکی جواب يې د خپل انګريزي کتاب-ان ای فارن اپروچ ټو څوشحال- کښې ورکړو-
کامل هغه محقق دی چې مونږ د هغه په شوي تحقيق تر اوسه د يوې نکتې هم اضافه ونه کړی شوه- د هغه تحقيقات تکراوو او په خپلو نومونو يې وړاندې کوو-
کامل هغه خود داره انسان دی چې د صدر ضيالحق په لاس يې د صدارتي ايوارډ او اعزاز نه هم ځکه انکار وکړو چې وييل يې زه د ډيکټيټر د لاس اعزاز اعزاز نه ګڼم—
کامل صيب د رياکارۍ او شهرت پسندۍ نه دومره لرې وو چې د ريډيو او ټي وي پروګرامونو کښې د ګډون نه يې په کامله توګه ځان په ډډه ساتلی وو او ټول ژوند يې ليک او تحقيق ته ورکړی وو-
کامل صيب د کاکاجي صنوبر او حمزه بابا په ملګرتيا نه يواځې د اولسي ادبي جرګې جوړول ممکن کړل بلکې پښتنو ته يې د تنقيد او تحقيق هنر هم وروښودلو–
کامل هغه سړی وو چې په پښتو اردو انګريزۍ او فارسۍ ژبو کښې خو يې کتابونه چاپ دي خو ورسره په عربۍ سنسکرت هندۍ او پنجابۍ ژبو يې هم عبور لرلو–
په سياسي توګه د مسلم ليګ سره وو خو د هغه هومره پښتون قامپاله به ډير کم وليدی شي–داسې به يې وييل —
زما خاوره پښتنه پښتو مې خوئ دی
د وفا خوئ مې اخلی ځان و تن کښې
اوس دغه لوې انسان ته د خپل عصر لويو خلقو خو خراچ تحسين پيش کړی دی خو زمونږ غفلت هم هغسې دی–د کاکاچي صنوبر غوندې مشر وايي چې–
تا خو صنوبره هيڅ غزل نه وې
دا خو د کامل او حمزه چارې دي
د حمزه بابا غوندې لوې شخصيت ورته په نثر کښې ځايې په ځايې درناوی وړاندې ګړی دی–
قلندر مومند په ګڼو شغرونو کښې د کامل نه د تاثر زدکړې او استفادې اعتراف کړی دی–يو شعر کښې وايي–
د کامل همنشينۍ برکتي کړم
تجربې مې په غزل کښې روايات شي
دهميش خليل غوندې محقق يې خپل استاد ګڼي او په شلګونو ليکونه يې پرې کړي دي چې د هغه د وفات په موقع يې دا هم وييلي دي
يو انسان وې چې کامل وې
خير رسانو کښې شامل وې
اوس به مونږ د خپل ځان او خپل نوي نسل نه پوښتنه وکړو چې مونږ او تاسو کامل صيب څومره پيژنو— د هغه کار وزيار نه څومره خبر يو –هغوي ته مو څومره خراج تحسين وړانډې کړی دی— مونږ پرې څومره کار کړی دی— او د کامل مرحوم په پښتو ژبه او پښتون اولس د کوم احسان بدله مو ورکړې ده— زما خيال دی چې د غفلت او ملامت نه سيوا به هيڅ ونه وييلی شو—- روح يې ښاد—
